Lunes, Ika-32 Linggo ng Karaniwang Panahon
— San Leo ang Dakila, Papa at Doktor ng Simbahan (Alaala)
Para
sa mga huling linggo ng taon ng Simbahan, bumabalik tayo sa Lumang Tipan at
sa linggong ito, binabasa natin ang Aklat ng Karunungan na isinulat bandang 50
BC sa Ehiptong lungsod ng Alexandria at iniugnay kay Haring Salomon. Sa
panimulang bahagi, sinasabi sa atin na ang Karunungan ay kaibigan ng tao ngunit
hindi magpapahayag sa mga sumusubok dito o naghahanap na dayain ito. Hindi rin
ito matatagpuan ng mga naglalaan ng kanilang buhay sa kasalanan. Ang karunungan
ay ang Espiritu ng Diyos na kumikilos sa mundo.
Sa
Ebanghelyo, sinasabi sa atin ni Hesus na dapat nating patawarin ang mga
nakagawa ng masama sa atin kung sila ay babalik at hihingi ng kapatawaran.
Gaano man karaming beses tayo saktan ng isang tao, kung siya ay lalapit upang
humingi ng kapatawaran, dapat natin siyang patawarin. Sa parehong paraan,
dapat din tayong humingi ng kapatawaran sa mga nasaktan natin, at kasama rito
ang Diyos. Hindi tayo makalalapit sa Diyos upang humingi ng kapatawaran kung
hindi tayo nagpapatawad sa iba at hindi tayo makakaasa na patatawarin tayo ng
iba kung hindi natin hahanapin ang kanilang kapatawaran at kinikilala na ang
ating ginawa ay mali.
Leave a Reply